بۇ یوخونو بۇ هفته گؤرموشم. یۇخودان دۇرونجا یازدیغیم اۆچون چوْخو یازی قیلیغینا گیرمیشدیر:

یوْلداشیملا داغلیق بیر یئره گئتمیشدیک. بیر داغین باشیندا بیر بینادا یئرلشن عابیربانکلاردان خالق آیلیقلارینی آلماقدایدی؛ آیین ۲-سی ایدی٬ بیر آز آیلیقلاری وئرمکده گئج قالمیشدیلار! نئچه نفر پولیس ده آیلیقلارینی آلیردیلار٬ چوْخو بینانین آرخا طرفیندن. ائله بیل بیزده عابیربانک‌لیق ایشیمیز وار ایدی٬ آنجاق خالقین صفده اوْلدوغوندان اؤترو واز گئچدیک...

اوْتوردوق. قارشیمیز داغلیق ایدی. داغلارین آراسیندان یوْل کئچیردی. یوْلداشیما «باخ اوْ داغین قایالاری چادیرا (یۇردا) بنزه‌ییر» دئدیم. اوْ «هه٬ اۆستلرینه چادیر چکیبسن ائله بیل» دئیه یانیتلادی. یوْلون یاخینلیغیندا یئرلشن بیر قایانین آلتیندان چوْخ اۇجابوْیلو بیر موْلّا چیخیب یۇخاری‌یا ساری یوْلا دۆشدو. من موْلّانین اۇجابوْیلوغوندان شاشیردیم (تعجوب ائتدیم). موْلّانی یاخیندان گؤرمک اۆچون ایکیمیز ده یوْلا ساری قاچماغا باشلادیق...

یئر آلیتیندا یئرلشن بیر بینادان (سایتدان) باش چیخاردیق. اوْرادا ایکی قیز (بیری قارا) بیزیم اۆستوموزه حیرصلندیلر. بیری منی دۆمسوکله‌یه‌رک اوْنا پیس نیّتیمیزین اوْلمادیغینی آنلاتماغا چالیشیردیم.

شئیطان کروانی: 

چوْمورلوق اطرافلی بیر یوْلدا بیریسی گئدیردی. بیردن یوْلدا نئچه بوْش ماشین تاپیلدی! ماشینلارین بیری اوْنون اؤنونده ساخلایاراق قاپیلاری آچیلدی. کیشی دال قاپیدان ماشینا میندی. ماشینین سۆروجوسو یوْخ ایدی٫ شوفر طرفینده اَیلشیب سۆرمگه باشلادی. قالان ماشینلار دا آرخاسیجا گلیردیلر. یوْلدا سۆررکن ماشینین دری ایله دوْلو اوْلدوغونو آنلادی. دریلردن نئچه‌سی قوْرخونج بیر شکیلده صندللرده اَیلشمکده ایدیلر. بیردن بیر سیرا قوْرخمالی آدام-حئیوان ماشیندا تاپیلدی٬ کیشینی سس-حرکتلری ایله قوْرخودوردولار. سانکی بۇ ماشین کروانی شئیطانی بیر آماجا گئدیردی...